KJØLSDALSSONGEN

Tekst:    Hjørdis Gilleshammer - 1999

Melodi: Alf Rosenlund - "Bondekvinnemarsjen 1950"

 

Kjølsdal vår heimbygd med nut og med koll

gardar og grender med grasgrøne voll

arv i frå ætter som odla vår jord

i seklar mot to tusen år

 

Snøkvite fjella om dalen står vakt

fargerik fauna i sommarleg prakt

Ljådalsvatn dormar med solgull på fjell

der småfisken vakar mot kveld.

 

Eldgamle sætrar med fjøs og med sel

beitande bøling med kulokk om kveld

gjestebodshelgar i lysteleg lag

i sela kring rømekollfat.

 

Til Kvandalsegga i luftlette lag

ved stien det blømer ein høgsommardag

med ro i din tanke og glede i sinn

då høgfjellets fred den er din.

 

Song i frå lier og sus ifrå elv

brusande vårliv der kvitveisen skjelv

bivrande tonar frå framfarne år

til songen om heimbygda vår.